11 қыркүйек – кітап оқу мәдениеті мен ағартушылық бастамалар тоғысқан күн.
11 қыркүйек күні ҚР Ұлттық академиялық кітапханасында «KitapTime – 2026» V жалпы республикалық кітап фестивалі өтті. Фестивальге «Сенімен Болашақ» РҚБ белсенді қатысып, кітап оқу мәдениеті мен адами құндылықтарды дәріптейтін ағартушылық бастамаларын көпшілік назарына ұсынды.
Ауқымды іс-шараға бірлестіктің Құрылтайшысы, Идея Авторы Нұркен Жарылқапұлы Асанов қатысты.
«Сенімен Болашақ» қандай бастамаларды ұсынды?
Бірлестік «Өзіңді тап, өзегіңе орал» ағартушылық бағыты аясында жарық көрген 500-ден астам кітапты, сондай-ақ жауапкершілік құндылықтарын дәріптеуге бағытталған «Senіmen Game» үстел ойынын таныстырды.
«Оқитын ұлт – озық ойлы ұлттың кепілі»
Фестивальдің мазмұнын байытқан маңызды алаңдардың бірі – TEDx форматындағы ашық микрофон болды.
Онда «Сенімен Болашақ» РҚБ-ның ағартушылық бағытының жетекшісі Жақыпбай Ақерке Асқарқызы «Оқитын ұлт – озық ойлы ұлттың кепілі» тақырыбында сөз сөйледі.
Ол кітап оқудың адам болмысын қалыптастырудағы, ой-өрісті кеңейтудегі және қоғамның интеллектуалдық әлеуетін арттырудағы маңызына тоқталды.
Шетелдік дипломаттардың қызығушылығы
Фестиваль барысында «Сенімен Болашақ» РҚБ павильоны келушілердің ерекше қызығушылығын тудырды.
Түрікменстан, Тәжікстан, Иран, Куба, Бразилия және Малайзия елшіліктерінің өкілдері арнайы келіп, бірлестік ұсынған кітаптармен және ағартушылық жобалармен танысты.
Шетелдік дипломатиялық өкілдер кітаптарға жоғары бағасын беріп, өз кезегінде бірлестікке өз елдерінің әдебиеттерін сыйға тартты.
Кітап – ұрпақтан ұрпаққа жалғасатын рухани мұра
Шара барысында кітаптың ұрпақтан ұрпаққа жалғасатын рухани мұра ретіндегі мәніне де ерекше көңіл бөлінді.
«Сенімен Болашақ» РҚБ Төрағасы Гүлшат Серикбекова қазақ өнерінің мақтанышы Димаш Құдайбергенді өмірге әкелген Светлана Айтбаеваға Мәшһүр Жүсіп Көпейұлының бес томдық шығармалар жинағын сыйға тартты.
Осылайша, «Сенімен Болашақ» РҚБ-ның ағартушылық мұрасы Димаш Құдайбергеннің жеке кітапханасынан да орын алатын болды.
Кітаптар Ұлттық кітапхана қорына табысталды
Фестивальдің тағы бір маңызды нәтижесі – «Сенімен Болашақ» РҚБ кітаптарының ҚР Ұлттық академиялық кітапханасының қорына табысталуы.
Бұл – бірлестіктің ағартушылық бағыттағы еңбектерін сақтап, оларды кең оқырман қауымға ұсынуға мүмкіндік беретін маңызды қадам.
Енді кітапхана оқырмандары «Сенімен Болашақ» РҚБ-ның кітаптарымен танысып, оларды өз ізденістеріне пайдалана алады.
Ағартушылық ынтымақтастық жалғасады
«Сенімен Болашақ» РҚБ мен ҚР Ұлттық академиялық кітапханасы алдағы уақытта да кітап оқу мәдениетін дамыту, ағартушылық бастамаларды қолдау және саналы, ойлы ұрпақ қалыптастыру жолындағы өзара ынтымақтастықты жалғастыра бермек.
