Ажырасқаннан кейін балаға отбасы сезімін қалай сақтап қалуға болады?

Ажырасу бүкіл отбасының қалыптасқан өмірін өзгертеді. Балаға анасы мен әкесінің енді бірге тұрмайтынын түсіну қиын болуы мүмкін, әсіресе ол бұрын ата-анасын үнемі бірге көруге үйренген болса. Осындай кезеңде бір нәрсені есте ұстаған жөн: ата-ананың ажырасуы бала үшін олардың біреуінен айырылуды білдірмеуі керек.
Біздің тәжірибемізде ата-ананың ажырасқаннан кейін баламен қарым-қатынасты қалай дұрыс құруға және онымен эмоционалдық байланысты қалай сақтауға болатынын білмейтін жағдайлар жиі кездеседі. Кейбір ата-аналар баласымен мүмкіндігінше көп уақыт өткізуге тырысса, енді біреулері қарым-қатынасты қалай жалғастыру керектігін білмей, керісінше алыстай бастайды. Кейде ересектер баланың өздерінен алыстап кетуінен қорқады, ал кейде бұрынғы ерлі-зайыптылардың арасында жанжал сақталған жағдайда баламен қалай қарым-қатынас жасау керектігін білмейді.
Ата-ана ерлі-зайыпты болудан қалса да, олар өз баласының ата-анасы болып қала береді. Сондықтан мүмкіндігінше екеуінің де баланың өміріне араласуын жалғастырғаны маңызды: оның оқуына, денсаулығына, қызығушылықтарына көңіл бөлу, бірге уақыт өткізу, ол үшін маңызды жағдайларда қолдау көрсету. Бала отбасындағы өзгерістерге қарамастан, ата-анасымен қарым-қатынасы жалғасатынын сезінуі керек.
Баланы ата-аналар арасындағы жанжалға араластырмаған жөн. Одан екінші ата-анасына хабар жеткізуді, оның жеке өмірі туралы айтып беруді немесе ол туралы жағымсыз пікір білдіруді сұрамау керек. Бала ата-анасының арасындағы дәнекерге айналмауы және олардың бірін таңдауға мәжбүр сезінбеуі тиіс.
Сонымен қатар, балаға күнделікті өмірінде тұрақтылық қажет. Мүмкіндігінше оның қалыпты күн тәртібін, оқуын, үйірмелерін, достарымен және жақындарымен қарым-қатынасын сақтаған дұрыс. Айналасында белгісіздік неғұрлым аз болса, бала жаңа жағдайға соғұрлым жеңіл бейімделеді.
Ата-ананың болған жағдай туралы қалай сөйлесетіні де маңызды. Баладан ажырасу фактісін жасыру міндетті емес, бірақ жағдайды кінә артпай, қарапайым әрі түсінікті сөздермен түсіндірген дұрыс. Бала: «Біз енді бірге тұрмаймыз, бірақ екеуіміз де сенің ата-анаң болып қала береміз және сені жақсы көріп, әрдайым қолдаймыз» деген сөзді естуі маңызды.
Кейде ересектер бала жаңа өмірге жай ғана «үйреніп кетуі керек» деп ойлайды. Бірақ әр баланың жаңа жағдайға бейімделуі әртүрлі өтеді. Бала мұңайып, ашуланып, тұйықталып қалуы немесе бір сұрақты қайта-қайта қоюы мүмкін. Бұл оның жағдайды дұрыс қабылдай алмай жатқанын білдірмейді. Оған жай ғана көбірек уақыт пен қолдау қажет болуы мүмкін.
Ажырасқаннан кейін балаға отбасы сезімін сақтап қалу - ештеңе өзгермегендей көріну емес. Бұл - балаға отбасының өзгергенін, бірақ оның ата-анасының махаббатынан, қамқорлығынан және олармен байланысынан айырылмағанын сезіндіру.
Ең бастысы - бала өзін ата-анасының екеуіне де маңызды екенін және олардың арасындағы қарым-қатынасқа жауапты емес екенін білуі керек.